Oleh: Elifas Tomix Maspaitella (Pemerhati Sosial)
Acim: Sander e, se pegang potlot tuh par apa?
Sander: jang maniso par batanya bodo-bodo
Acim: eh muka karnikus nih, beta tanya sadiki sa se su babengkeng e
Sander: la kalu su lia beta pegang potlot tuh masih tanya lai? Par tulis jua mi, skang apa?
Acim: iyo, tulis apa?
Sander: tulis apa, tulis di mana, tulis apa par sapa? Loko tanya samua skali biar beta jawab skaligus lai, jang rei akang parsis ikang lumba-lumba pi skolah
Acim: se mau tulis apa?
Sander: (seng dapa stori lai, bukang tagal marah mar tagal dia loko potlot salah)
Acim: su sadar? Tulis apa? Tulis di mana? Tulis par sapa? He muka itang badaki e, orang tuh kalu karja par diri sandiri, dia tau musti biking apa mulai dar mana la abis di mana. Biking deng apa, karja deng sapa. Mar macang se nih bukang, tagal karja par orang, la konci rekeng loko potlot bukang potlot par tulis di kartas mar potlot tukang par kas tanda tiang nok deng balak. Su sadar?
Sander: (su tar tau bicara lai)
Acim: he, rekeng umur la lia anana sana tuh tambah hari tambah basar. Tempo apa se stop karja par orang pung piala la se pung lapangan sa se seng tau akang pung panjang deng lebar. Antua Nani dong pung pengajarang bukang, akang bagini: _har ahad, dudu tado di rumah sa. Har mandag, pi pameri sadiki di kabong, lia pisang sarambu, kas barsih kuming samata, har dua, har tiga, har ampa, pulang su deng hahalang kayo bakar, mar di muka tuh kasbi sakamboti, la timbang deng pisang ampa pul hari sarambu kacil jua su bae”. Mar se nih bukang, har ahad sondor unju muka di pintu gareja, la har mandag sampe har ahad tula tuh, tinggal rekeng orang pung piala. Rekeng umur babae nyong. Jang parsis su matahari maso la mau depa lai kaki babuang.
Penulis : Redaksi
Editor : Redaksi
