Oleh: Elifas Tomix Maspaitella Pemerhati Sosial
Orang tatua deng basudara tuang hati jantong!
Sander baru dar Bendar. Pas sampe negri, poti-poti ka Sibu pung rumah. Tatongka paitua Acim di jiko pagar bunga manor.
Sander : (lari amper tabrak Acim) Ee abang jantong hati e, tadi kalu beta laju sdiki deng abang rubu lai. Hahaha…. jang marah kio
Acim : se kira beta loga-loga parsis deng se yang suka makang pisang rubu-rubu ka apa???
Sander langsung loko Acim tangang, par mau slak lari sama-sama.
Acim : (bale hela Sander) he Alexander, se paparipi apa?
Sander : suda, jang batanya. Lakas suda, jang bet konyadu pi ka pohong sagu
Acim iko Sander sa. Pas talapas jiko pagar tu, dapa lia Sibu di blakang Acim pung dapor
Acim : Nyong e, sabar situ. Jang geser do
Sibu : ini dong dua baku hela macang tunangang mau lari kaweng sa ni
Acim : tuang maka tau se pung konyadu muka mancadu nih. Eh Alexander coba se riwayat tagal apa se paparipi la hela beta sampe beta napas su tongka nih??
Sander : Nyadu, dong dar Walanda ada kiring apapa ka???
Sibu : kiring apa?
Sander : ao bet dapa dengar ada kirimang dar paitua Ais dong di Walanda?
Acim : Bapa sumbayang kami. Alexander e, jadi se hela beta cuma par tanya kirimang dar Walanda??
Sander : ao sudahm abang e, tutu gargantang tu do
Acim : he. Se bilang apa? Os kas kaluar kata os kira sadawar deng beta. Ana tar tau maner, mar lia dia tar mister orang tatua
Sander : hahaha…. jang mara tua e, eh muda e….. coba tado la dengar bet konyadu taru suara dolo
Sibu : Seng ada kirimang, cuma Wate Ais kas pasang sa
Sander : ao, ada kirimang mo
Acim : Sander, buka se talingang, rabe os biji mata la nganga beta ni. He, jang tagal barang tai-tai la konci rekeng hidop konyadu jadi ba abu.
Sibu : hahaha… itu akang abang. Ini skang tagal brot Walanda la katong muka brot laeng deng laeng
Sander : jadi seng ada kirimang o nyadu??
Acim : Alexander, kal itu, antua Ais pasang tu beta yang dengar akang dari dong pung nene Minci.
Sander : barang Nene Minci dapa abang di mana?
Acim : di sini, pas tadi bet ada kudung bulu cina di muka rumah tu la antua datang. Mar tagal antua tar lia kamong dua batang idong, antua taru pasang di beta to
Sander : pasang apa???
Acim : ose deng se konyadu musti kumpul basudara la bilang dong jaga lia ruma tua sana tu. Lawa-lawa di manumata tambong. Loko sapu-sapu tarnate la kas barsih akang
Sibu : bet su bilang konyadu ni dar kalmaring dolo laeng abang e. Mar dia inga baheu ka sana ka mari jadi balong par potong bulu pangkuku tu
Sander : beta kira kirimang padahal pasang sa
Acim : Sander, se ni bukang cuma suka makang makanang panas, mar duriang nyawar, bicang mesung lai kal se dapa skang se labrak kapa?
Sander : sudah jua. Eh mar apa di tangang tuh nyadu? Dari tua ni pung dapor ka?
Sibu : iyo, bet maso ambel pontong api la lia antua Oda pung ganemo aer garang la bet minta par tola papeda bungkus ni
Acim : dar pada makang cabar labe bae papeda bungkus nyong e
Dong dua tatawa mar Sander muka tinggal brot
Penulis : Redaksi
Editor : Redaksi
