Beta Rutah, Beta Maluku

Oleh: Fovi Yanti Sangaji (Peserta Lomba Cipta Puisi HUT ke-77 Provinsi Maluku)

Beta Asli Rutah
Kalau beta di rantau dong bilang
Rutah tu rumah tahanan alias rutan
Beta tau itu ejekan par beta
Tapi itu biking beta inga
Bahwa dasarnya katong di kampong memang paleng nakal
Kajahatang laki-laki parampuang sama
Mar beta tetap bangga jadi orang maluku

Kalau Ale Tanya Kanapa?
Karna Cuma di katong Maluku
“Potong di kuku rasa di daging, satu rasa samua rasa”
Rutah, Kecamatan Amahai, Kabupaten Maluku Tengah, Provinsi Maluku
Beta bangga terlahir di tanah Maluku
Dibesarkan deng sagu salempeng patah dua
Papeda panas ikang kuah kuning
Katong santap di bibir pante pasir hitam
Angin sepoi-sepoi, musik ombak berkejaran biking mata tatup

Baca Juga: Kisah dari Madras

Maluku Tanah Air Beta
Rambut ikal kulit hitam manis
Beta Maluku
Kaya hasil alam, kaya budaya dan kaya hati
Hidup ade deng kaka
Basudara pela deng gandong
Beta Maluku
Jang cuma tagal ale dengar beta pung nama kampong
Lantas biking ale manipulasi pola fikir

Beta Rutah, beta Maluku
Basar deng agama dan adat
Katong juara bakalae
Mar ale harus tau
Biar hidop deng susah
Biar katong nakal deng kajahatang
Suara basar sama deng ombak di laut
Tapi kalau sampe katong su pigi inja tanah rantau
Itu katong harus pulang bawa hasil
Busu-busu bagini katong paleng sayang deng inga katong pung orang tatua

Baca Juga: Perut Arumbae

Lounussa Tomarala
Maluku Tanah Air Beta
Selalu rindu par pulang makan pattita
Lantik raja-raja
Tipa babunyi katong hadrat rame-rame
Hujan turun katong lari mandi air masing
Biar pulang rumah
Mama pukul deng sasapu
Mar indah itu sudah

Maluku Tanah Air Beta
Selalu rindu deng bangga jadi anak maluku
Beta Rutah, Beta Maluku

Penulis : Redaksi
Editor : Redaksi