Oleh: Elifas Tomix Maspaitella (Pemerhati Sosial)
Orangtatua deng basudara tuang hati jantong!
Sander deng antua Acim nih macang dong dua jadi bakambar sa. Dong dua par pagi-pagi nih kaluar ka dusung sama-sama. Baru lia sanang paskali.
Acim : Sander, poti sadiki. Su itang di atas tuh
Sander : La kalmaring dolo bulang pono tuh kong mangapa langit su itang nih lai abang e
Acim : Sudah, wer nih akang su dudu salah tampa. Samua su tageser. Timor su tar batul hari, la Barat jua nai su seng pas tanoar
[Ujang ampas]Acim : Itu, bet su bilang tadi toh. Napa su ujang ampas nih
Sander : Mulu panas tuh
Acim : Mulu panas apa. Itu artinya beta pande barekeng tanoar, tar sama ose la kal’ ada apapa tinggal kas salah orang
Sander : Ao sudah, loko bale jua kapa
Acim : Alexander, ose nih baru ujang ampas sa su pikir jalang bale. La kalu banjir hener skang ose pindah negri ka’apa? Peci negri nih su gali ose kaki, ose tau ka seng?
Sander : Mo kal’ bagitu tunggu
Acim : [badiri tunggu]
[tar brapa lama Sander bale deng daong pisang dua jaga]Sander : ambel satu nih. Bungang-bungang su tua, manumata su tabuka, tar pele la ingos malele sang hener
Acim : Ose pande, mar ose angka muka lia langit sana
Sander : Ampong dosa jua. Lo tadi su ujang ampas tuh la mangapa skarang su panas manyala nih lai?
Acim : La se mau kas salah matahari ka awan?
[Tagal Sander bajalang deng hati babengkeng, inja kanal kuli pala busu, langsung Sander manjura lai. Talucu tapanjang-panjang]
Baca Juga: Stop Karja Par Orang
Acim : hahahahahahahahahahahahahahahahahahahahahah ahahahahahahahahahahahahahahahahahahahahahahahahahahaeeeeeeeeeeeee. Sander e, beta baru pernah lia kodok itang arang seng blumpa mar manjura nih. hahahahahahahaha
Sander : jalang nene moyang e
Acim : hahahaa……. se tau yang beta bilang peci negri su gali se kaki toh? Jang kas salah jalang. Ose yang salah buang kaki. Jalang nih dar’ dolo akang bagitu, tar ada orang jatuh. Baru se sa nih…. hahahahaha
[Sander ada ba’uru panta yang tatumbu akar gayang]Acim : panta saki o?
Sander : akar gayang nene moyang nih
Acim : Se salah. Itu gayang ende. Yang batul tuh ose pung panta gayang
Sander : eh tua bangka e
Acim : hahaha…. se su salah langkah toh. Bangka ka situ. Hahahahaha
[Acim tinggal bajalang tarus ka dusung, la Sander iko palang-palang dar balakang tagal panta ada palahatu]Penulis : Redaksi
Editor : Redaksi
