Oleh: Elifas Tomix Maspaitella (Pemerhati Sosial)
Orang tatua deng basudara tuang hati jantong.
Alexander ni bukang, kalu satu hari tar maniso par cabar antua Acim darah nai mangkali dia katagorang kapa. Ini ni, antua Acim ada dudu iris kalapa par kas makang ayam, dia biking kaget deng ujung piso makang ujung jare telunjuk lai.
Acim: Alexander nau-nau ee…..
Sander: Ya tuheng, abang e, su bagumana skali ni
Acim: bagumana skali se pung buta huruf tu
Sander: iyo te, lo apa kong abang tar bisa lia mana kalapa deng jare lai ka
Acim: eh, pi loko palita sana kamari la tiris minya tana di sini dolo, nau-nau e
Sander lari ka dapor loko palita
Acim: bawa kaeng panggal spanggal lai. Capaaaat
Sander bale kumbali cari kaeng panggal
Acim: Sander e, poti sadiki, dara tırıs ni, Sander eee
Sander: (bataria dari dalang dapor) mo mau loko kaeng panggal mana ni? Cuma ada angka-angka ni
Acim: loko kamari saja
Tagal taku antua Acim bamulu, Sander loko kaluar deng palita
Acim: Kaeng panggal mana karnikus bodo e???
Sander seng brekeng banya lai, doa loko piso dari antua Acim tangang la iris ujung baju kous lalu tiris minya tanah di akang luka tu la bale deng kaeng dari ujung baju kous.
Sander: aman
Acim: aman se pung nau-nau tu
Sander: la abang lai, sabang hari iris kalapa la apa kong jare ta’iris
Acim: kalu se seng kas kaget barang beta pi iris jare sandiri? Se kira beta nau-nau macang se la iris diri sandiri pung barang?
Sander: mo untung bae kata cuma ujung jare. Tadi kalu jare kudung la kira orang kiring doti api
Acim: Untung bae-untung bae se pung buta huruf tu
Sander: sudah tu, beta kurang bae apa coba, suru loko palita, beta su loko. Suru loko kaeng, beta su kasi lai tu, padahal di dalang tar ada kaeng spotong lai
Acim langsung panggel ayam par makang
Acim: kur….kur….kur….kur…..
Sander: abang e, beta tu tadi mau bilang par abang, skarang ni jang maniso par bakumpul-bakumpul dolo. Akang korona ni balong par klaar lai. Mar untung bae su ada suntik vaksin la orang banya su kasih diri par vaksin akang korona ni. Semoga akang barang bardosa ni loko pi par setang ka mana ka sana ka, su lama tar dudu minong kopi, baru kata su ada tampa-tampa minong kopi baru lai. Musti coba ni, mar mo korona ni
Acim seng meku sadiki lai. Acim tinggal panggel ayam mar makang
Acim: kur…..kur…..kur……kur……
Sander: Beta pi jua e, tua e. ….. lha ini talingang su kapongke kapa e….tuli e
Acim sondor meku, tinggal panggel ayam
Acim: kur….kur…..kur……kur…….
Sander bale blakang jua mo. Su ator rencana ka bendar to, jadi laki-laki bajalang stan paskali par tunggu oto. Bagitu mau nai trap-trap par ka straat, Sander skrek tar bae paskali
Sander: Abang eeeeeee……..Acim dara mati eeeee……..
Sander bale ka antua Acim yang ada tinggal kasi makang ayam
Sander: Abang e, tuheng, kaeng di ujung jare tu beta pung kaki baju kous nih tuheng e….ini ada baru dapa hadia ni tua eeee……dosa apa kong beta su potong akang par bale di jare karepu tu lai tua ee…..
Acim: kur….kur…..kur….kur…..
Sander: eh tuli eeee……
Acim: untung bae seng potong muka clana
Hahahhahaa
Penulis : Redaksi
Editor : Redaksi
