Katong pake logat Ambon hari-hari saja par bahas akang ini… Jang bicara sepakbola Indonesia lai, talalu basar deng sagala hal permasalahannya. Tapi yang pastinya, PSSI pun ada berjuang perbaiki donk pung tata kelola perkembangan sepakbola Indonesia.
Naturalisasi ada jadi program (beta istilah akang) jangka pendek PSSI untuk bikin persaingan sehat antara diaspora deng pemain lokal. Kompetisi liga jua, donk ada bikin akang su mulai lebih profesional dan sebaik mungkin (menurut dorang).
Tapi sudahlah, itu urusan dong yang baku tarika deng sepakbola nasional. Lalu Maluku, bagaimana?.. Ha.. Ini sadap. Bicara bola di musim piala dunia ne akang enak-enak, manis, pahit dan asam kayak nano-nano. Tapi bangun sepakbola di Maluku ini, akang rasa pahit deng hambar, bolom dapa manisnya.
Bagaimana seng? Masyarakat fans sepakbola ambon kalo pawe, Juara. Dong bisa tutup JMP dua arah dari ujung k ujung. Itu balom deng yang takandas-takandas, tagal polisi pele, deng bagi pawe berdasarkan tata letak wilayah Pulau Ambon. Masih bilang Fanatisme masyarakat membangun sepakbola Ambon kurang? Bukan kurang, tapi labe ka su bosan mau bangun sepakbola di Ambon ini.
Katong seng bicara Maluku lai karena mungkin talalu luas deng kompleksitas masalah yang dialami berbeda-beda karena terdiri dari beberapa kabupaten/kota kepulauan. Katong bahas sepakbola di Pulau Ambon sah, labe enak. Karena aksesbilitas dan fleksibilitas segala hal, lebih sangat mudah dijangkau.
Mari kombali ke Topik. Sebelumnya di atas katong su selesai dengan perdebatan tentang fanatisme sepakbola orang Ambon. Jawabannya, Seng Perlu diragukan lai, su pasti Fanatik. Titik.
Balik ke mangapa sepakbola di Ambon ne seng berkembang? Menurut beta, jawaban hanya ada pada tata kelola pengembangan sepakbola, yang belum diatur sebaik dan se-inovasi yang bisa katong orang ambon perbuat (beta pake kata-kata yang seng singgung sapa-sapa).
SDM Maluku ini seng kurang, dong pung bakat, kualitas, kreasi, inovasi, dan keinginan. Namun kata terakhir dari kalimat sebelumnya itu, rasa akang kayak diujung-ujung lidah saja, donk bikin kegiatan pun hanya panas-panas suam kuku. Sioo.. katong generasi berikutnya, yang dapa akang pung imbas.
Beta bukan pemain bola, hanya hobi deng bola, terutama bola kaki lapangan basar, barang di ambon ne ada bola kaki lapangan kacil (gawang mini) lai. Haa… itu labe terkenal deng diminati di ambon. Tapi katong disini seng bahas akang. Bale ulang ke topik, bola gawang basar.
Beta lanjut.. beta pung pengalaman bola hanya bikin klub bola di kampung dari nol sampe terdaftar di PSSI sebagai anggota (seng tahu sampe sakarang ne masih anggota, ka seng lai).
Penulis :
Editor :
