Bikin klub bola itu gampang, setelah jadi yang susah. Susah yang biasa klub bola alami itu, seng masalah, yang susah luar biasa ne, stagnan atau jalan di tampa. Kebanyakan katong stop urus bola itu karena seng ada uang lai, malu hati pi “batada-tada tangan” baharap orang, dan yang labe jadi beta fokus itu.
Katong stop bola itu tagal? Tarada perkembangan dan keseriusan for keberlanjutan apa yang yang katong inginkan, harapkan, cita-citakan dan bikin par generasi sepakbola di beta kampung khususnya dan di Ambon (Pulau Ambon) pada umumnya (cukup bicara di pulau ambon sah).
Samua itu bikin katong runtuh palang-palang dan barenti bapikir par urus sepakbola. Beda halnya deng dong yang ada tujuan lainnya. Dong masih disitu, mar su rem-rem kase tarobe kantong, biar jaga nama tetap eksis di masyarakat.
Beta perkenalan singkat di atas, su selesai, biar jang dong tanya dia ini bicara, terlibat ka seng? hehehe.. Beta masok deng mangapa menulis ini? Beta tulis ini biar katong sama-sama berbagi pengalaman dan tahu “part” mana sih, yang bikin sampe bola di Ambon ne seng majomajo?
Malah katong sodara di Maluku Utara sana, su labe berkembang dan labe pung niat par bangun sepakbola, par dong bakat generasi sepakbola di masa depan.
Katong samua tundu muka, cuman manganga deng mulu tabuka, heran dan bangga dari apa yang sedang terjadi di Maluku Utara. Tapi sebenarnya katong harus malu dan bertanya, mangapa seng bisa sama deng dong di Ternate?
Beta cuman mau bilang, di sana ada kantong yang siap tarobe. Kekuatan itu, yang sulit dan katong rasa 5-10 tahun bolom akang bisa menyamai. Pertanyaanpertanyaan itu, pastinya su bisa katong jawab sendiri. Itu dong pung rejeki, dong pung saat, katong hanya perlu lebih memacu diri untuk bisa berdiri sejajar kembali untuk urusan sepakbola.
Untuk konteks Maluku Utara dan sepakbolanya, su clear, apa yang direncanakan disana adalah hasil perencanaan bung-bung sepakbola dan didukung usi Sherly. Katong doakan saja semoga semua hal menjadi baik di sana. Aamiin.
Lalu apa yang katong harus bikin di sini? Jawabannya, harus bikin bae katong pung “Niat dan Kolaborasi”. Kalo seng ada itu, barang-barang “mantah” tetap. Niat dari awal, kalo seng niat par Maluku Pung Bae, stop.. Jang Lanjut.
Nanti, Kalo su ada niat, lalu saatnya kolaborasi, baku kele, par susun samua hal sama-sama dari dasar dan seng boleh berakhir. Tarus majo, sampe ada hasil dari dasar yang katong su tetapkan bersama.
Penulis :
Editor :
