Oleh: Berry Revelino (rapper, sketcher dan traveller yang suka mancing)
Par beta pung tamang-tamang deng sodara yang tinggal di negeri-negeri atau “kampong” bagitu juga anana adat, di ale pung negri tu ada sakumpul pengetahuan deng ajarang, yang mana menjelaskan kekayaan berpikir, cara karja deng manuwai (orang tatua) pung pintar, waris, pusaka deng hal-hal yang turun par anana cucu sekian masa.
Oras ni jaman labe maju deng laju, dan ale pung kampong adalah basis yang penting untuk mempertahankan “local genius” sebab di sanalah berjalan tradisi-tradisi dan budaya yang biking hidop barang-barang itu kio..
Di kampong ada identitas diri, manusia deng asal usul, perjalanan, hubungan sosial dan kekerabatan dengan entitas eksternal lainnya. ale pung matarumah, soa, pela, gandong, fam, pamali deng sebagai.
Di kampong ada hal-hal sederhana yang kasih ale pengetahuan yang begitu kaya, karja pake apa yang ada di alam, alat-alat tradisional yang bikin ale herang tagal takjub lia orang tatua pung kemampuan teknis deng teknik yang pas-pas nat.
Lalu tradisi deng budaya yang di kampong juga yang jaga bahasa daerah, jadi orang laeng juga bisa balajar akang, pake akang. Bagitu juga ada banyak carita, sejarah, maupun literasi yang turun lewat tuturang deng kapata-kapata.
Tagal samua itu musti tetap hidop supaya katong juga hidop, maka ale dong jang barenti balajar, tetap taru hati, buka diri par tarima waris. Apa-apa yang orang tatua karja harap catat akang, sebab katong seng pernah tau di waktu yang mana barang-barang ni akang hilang.
Barang ni kalo akang ilang maka katong galap samua abis, apalagi manusia modal raci kuah yang oras ni labe hari lebe puar macam cakalang mandidi su tamba banyak.
Satu lai, coba pikir, kalo sonder ada hal-hal dari kampong yang biking malakat, pasti rasa macam ada pikol nama saja mar barasa dagang. Ha ha ha
Dari acara ini, katong bisa tarek contoh kacil saja,
Kalo ale seng balajar cucu atap, lalu katong seng tau mana panggepe mana bangkawang, lalu seng tau hahesi, loleba, toti, basirik.
Lalu kalo samua ilang, orang tatua abis, sapa yang mo karja ganti atap beso-beso ni?
Jaga tana bae-bae! ❤
Foto-foto tradisi ganti “Ahapoput” Masjid Tua Wapauwe, Kaitetu, Kabupaten Maluku Tengah, oleh penulis.
IKUTI BERITA DAN ARTIKEL LAINNYA DI GOOGLE NEWS
Penulis : Redaksi
Editor : Redaksi