Oleh: Elifas Tomix Maspaitella (Pemerhati Sosial)
Orangtatua deng basudara tuang hati jantong!
Acim ni ada bakanor dar pagi sampe su galap ni.
Sander : Tua e, bakanor sa dengar parsis antua Mina kukur kalapa di kukurang. Hahahaha
Acim : Ose mari la beta tei se kapala ceret tu
Sander : bet nama masi Alexander dar har permandian. Jadi kal tar baterek abang, bukang Sander namanya. Hahaha
Acim : os tu jadi pas timor pica
Sander : la tadi bakanor apa?
Acim : bet herang deng manusia-manusia ni
Sander : barang ada yang model beda deng manusia?
Acim : ao seng jua. Mar ada yang hati nyawar par orang laeng.
Sander : hati nyawar tu bag’mana lai abang e?
Acim : Sander, ose tau bukang. Kalu tar ada orang laeng par tulung ose tar jadi manusia. Labe-labe se jadi balacang sa
Sander : he…la ini beta yang ada sala kong abang sumbur beta?
Acim : bukang. Itu umpama par kas inga ose sa. Beta jua tau ose tar bisa jadi manusia bae-bae di akang dalang dunya ni, mar kalu Tuhang ada kas bae ose jadi manusia, jang parsis sandal manyangkal kaki e
Sander : tabula bale. Kaki manyangkal sandal bole.
Acim : bodo. Kaki manyangkal sandal tu tuang tar meku orang karja
Sander : la kalu sandal manyangkal kaki?
Acim : itu rasa diri bisa bajalang sandiri la tar meku deng orang yang su tulung
Sander : mo kal bagitu cikar deng kaki isi sa to
Acim : itu suda. Katong ni tagal su bajalang kuliling negri ni, kuli kaki karas. Duri sagu jua patah mo
Sander : ada jua pica botol perna rabe ujung jare meme mo
Acim : itu cuma takikis kuli sa. Su kabal
Hahahaha
Ini par kas inga sa
Penulis : Redaksi
Editor : Redaksi
