Oleh: Elifas Tomix Maspaitella (Pemerhati Sosial)
Orangtatua deng basudara tuang hati jantong!
Ini hari bae paskali. Acim deng Sander nih kan amper tar bakumakang dalang banya hal mar pas hari ampa nih dong dua akoor.
Sander : Abang e, mangapa manumpang tuh makang pohong kas mati e?
Acim : itu biar se tau. Jadi hidop nih musti usaha deng karingat sandiri. Se pung sapuluh jare tangang kotor yang biking makang kanyang la sono jua sanang
Sander : iyo e. Mar beta pung tanya tuh abang balong manyau akang
Acim : manumpang tuh akang isap pohong pung makanang deng tali napas. Se lia langsa sapohong di ujung jumbatang tuh. Akang pung jaga yang babuang ka atas jalang tuh beta su letu. Tagal kalu kas tinggal la seng rekeng bulang lai jaga karing la mati te
Sander : la manumpang alus sa tuh
Acim : Sander, barang seng bae tuh jang kata alus, upeng sang tai kuku lai mar loko heku kas pindah tempo. Se talat akang makang dalang la konci rekeng badiri mar karing tar baraer.
Sander : iyo ale. Ini beta ada herang deng satu tabiat nih lai abang.
Acim : apa?
Sander : ada orang yang macang lupa kata dia jua pung kaki tangang ampa nih bisa biking dia dapa hormat
Acim : beta balong dapa slak par mangarti akang. Se bisa kas tarang sadiki?
Sander : dong macang pikir, orang lia dong kalu dong puji-puji orang laeng, orang basar bagitu.
Acim : se mau beta kasih umpama par akang lai?
Sander : hahala… kalu maeng deng umpama lai skang beta testa takoro tarus te
Acim : ao ini umpama randa-randa sa
Sander : coba. Beta pasang talingang babae nih
Acim : dong itu sama manumpang lemong kompormos
Sander : Tongisa. Ini beta urat testa kaluar lai jua
Acim : Nyong, manumpang lemong kompormos tuh akang makang pohong lai. Mar katong susah nai par letu tagal batang pohong baduri. Jadi maksudnya akang tabembeng di pohong biar orang tinggal lia lemong tuh mar seng bisa par loko akang manumpang tuh
Sander : mo letu akang jaga tuh jua biar manumpang mati deng jaga-jaga tuh
Acim : seng bisa?
Sander : tagal apa?
Acim : lemong kompormos tuh buah seng putus nyong. Se letu padahal se jua mau makang akang buah. Jadi konci rekeng se piara akang jaga tuh la manumpang tuh akang hidop lai te
Sander : kal bagitu rubuh lemong jua
Acim : hahaha…. skang orang banya iko se deng bangkawang
Hahahaha….
Ini umpama-umpama sa
Salamat penuh berkat par orangtatua deng basudara samua
Penulis : Redaksi
Editor : Redaksi
