Bacarita Birman

Manjai Baju Jua Tuang E

BACARITA BIRMAN

Oleh: Elifas Tomix Maspaitella (Pemerhati Sosial)


Orangtatua deng basudara tuang hati jantong!

Ana Alexander ni tar abis-abis biking paitua Acim mama gigi. Par sore-sore ni:

Sander : Abang e, hidop ni musti par sanang-sanang sa. Jang pikir susa, nanti skang balong par tujupulu lai su kerkoff

Acim : Ana karnikus alus ni. Beta ni su tujuhpulsatu mar masi bisa panggayo parao biar itu par kokahu

Sander : hahahalatala…… kokahu sakali la nai difang saminggu tu e

Acim : Yo ose, karja basar cuma ka lao ka dara mar nol. Kosong teteruga

Sander : hahaha…. jang jalus deng anana muda

Acim : oe, stand macang se ni bukang, sampe di bendar cuma jadi jongos par orang-orang di ruma kopi. Dapa suru pasang kopi sabeker mar biking diri parsis tuang mister, bandar dadu

Sander : kan yang penting gaul, tua e

Acim : gaul tida mo, galojo!!!!!!

[Slak bagini dong dua macang ada bak’ bisi-bisi]

Acim : Itu yang beta mau bilang par ose. Biking apapa tu bukang, musti pikir panjang. Musti ingatang babae paskali, su dar dolo, se stori sajingkal mar orang saleng akang jadi sadepa

Sander : iyo mar akang su bae-bae suda. Dong su bak’dapa la su minta ampong la laeng su kas ampong laeng

Acim : itu tabiat

Sander : itu apa?

Acim : minta ampong deng kas ampong. Itu tabiat adat. Basudara tu akang bagitu. Biking sala ka seng mar musti bak’dapa la stori akang babae. Tar usah bataria sang burung taong-taong pulang skola par mati-mati galap

Sander : Itu su jadi katong baju to

Acim : apa yang jadi baju?

Sander : minta ampong deng kas ampong to

Acim : ose pande. Beta ni kira ose ni tar simpang umpama-umpama dolo-dolo. Mar se otak jua seng kosong e

Sander : abang kira beta ni bodoh????

Acim : se mulai kumbali. Bet’ bilang se otak seng kosong

Sander : la itu kan sama deng abang bilang beta skola tar batul-batul to

Acim : se pung mangarti labe ni yang akang umpang hal kumbali. Stori deng se ni bukang, biking dara nai

Sander : abis abang dar’ dolo tar perna bisa angka-angka beta

Acim : ose pung makang puji tu. Teteruga ni!!!! Beta bilang ose pung umpama minta ampong deng kas ampong tu katong pung baju itu beta puji akang. Itu umpama bagus tentang katong tabiat adat.

Sander : ha, bicara bagitu bole, jang pake rangke-rangke kata laeng-laeng tu

Acim : iyo suda. Jam ini ose pande. Jadi bet’ mau kas inga sa, “kalu ada tarobe sadiki di baju tu pung katia ka kaki baju ka, jang robe par biking angka-angka di pinggir tungku. Manjai akang biar deng jarong tangang jua seng apapa. Yang penting jang bajalang deng malu tagal orang lia isi badang”

Sander : itu bole. Abang ni bole lai.

Acim : itu ilmu orang yang su tujuhpulsatu

Sander : iyo, orang yang su tua bangka

Langsung Sander lari, la antua Acim medi dia deng sandal lily sabla


Penulis : Redaksi
Editor : Redaksi

Berita Serupa

Back to top button