Oleh: Elifas Tomix Maspaitella (Pemerhati Sosial)
Orangtatua deng basudara tuang hati jantong!
Sander ni bukang, kalu seng tamaso deng orang takaluar mangkali dia apapa saki kapa. Ini tar tau kata ada babengkeng apa la tinggal bakanor sama denga da mama sanoli sa mulu, barang pipi tinggal kambong tar brenti.
Acim: husss….eh tusa e….pinda dari situ…..husss e (Acim pura-pura user tusa)
Sander ni dia keker sa. Dia tau ini Acim ada cari perkara nih tagal sondor ada tusa sa ekor lai di situ. Sander sein sa, ini kalu Acim ulang lai ni skang Acim dapa skot ni jua
Acim: pusss…..pusss…pussss…….. Oda e, lia tusa mulu itang sa ekor tu di situ ka?
Bukang Oda yang manyao tida, skrek bagini ada suara dari teras sabla
Sander: Tusa mulu itang tar ada, yang ada cuma tusa dalang muka itang
Acim: (tatawa manging paskali) hahahaha…….se jumawa e…..hahahah…..
Sander: Abang tu kalakuang tar buang-buang sadiki setang blakang blubang
Acim: hahahaha…..setang blakang blubang tu biking orang ilang dalang utang Sander
Sander: iyo, la dia ambel siang padis toh, parsis abang ni, biking orang jumawa par matahari ada tikang dalang muka ni
Acim: hahaha…..se bakanor apa dari tadi? Se ni kalu seng bakanor, kewel te. Dua tu saja yang kalu se biking, akang lia moi paske. Tagal kalu se biking apapa yang bae-bae tuh akang lia fals
Sander: jang talalu taru kira beta. Beta mau bakanor ka kewel ka barang abang poro ka apa ada saki?
Acim: mi seng te. La sapa jua ada mau pi taru hati par se tabiat tu. Se ni bukang, suka par makang puji la jual sombong
Sander: satu lai kumbali. Stori macang deng burung taong-taong
Acim: beta tanya sa, se ni ada bahati deng apa ka sapa ada biking se hati badugal?
Sander tado sa sondor manyao
Acim: se ni kalu beta rai, pasti ada biking apapa tar batul lalu orang ada sein se la su taku kaluar ruma tagal su tau bodo to
Sander: bukang bagitu abang. Katong ni kan cuma turut printa sa toh. Kalu bos-bos su suru biking la sapa kuat par bilang seng. Mi biking te, biar kong sala, itu urusan blakang, asal biking dolo
Acim: beta su dengar. Sorang ni biking apapa tu iko modo. Bajalang ukur orang pung ujung kampong la lia dong apapa sadiki yang akang tar ada di negri, la pulang biking akang, la kira kata itu su bagus tu. Skola tinggi, jadi orang basar, la mangkali unju pande, ini unju bodo sisa tu.
Sander: mo skang mau bagumana, kalu dong su bilang bagus, mo katong yang alus-alus mangaku sa te
Acim: iyo, bagus te. Barang mau skepeng tu. Pas dapa la karja tutu mata sa te.
Sander: suda jua, barang su jadi tu katong mau bilang apa?
Acim: Turut sala-sala tarus. Lama-lama lai orang bilang se gale parigi di tenga straat la se gale lai. Oe, ingatang, tusa tu to, se user akang bongko blakang sa, se labe dia cakar. Mar sorang ni, tar ada yang panggel sorang tanya, balong dapa panggel lai ka? Awas jang setang blakang blubang panggel la iko, la dapa kas makang sadap padahal peci. Seng lia Olop Kumbili sana tu?
Sander: suda jua, beta jua su tau yang Olop tu
Acim: iyo, awas jang sampe jadi sama Olop
Penulis : Redaksi
Editor : Redaksi
