Beta deng Salim parna lewat kawasan itu malam-malam, waktu katong pung oto trayek Air Salobar dicarter. Salim itu beta pung sopir saat beta kanek oto di dia. Waktu ka sana lumayan karna masih ada penumpang. Tapi bagitu pulang, tinggal beta deng Salim sa. Beta yang biasa dudu di balakang, langsung pindah ka muka.
Ya Tuhan, ale bisa bayangkan, katong pung takotang sa kayak apa. Beta sampe pegang asesoris yang tagantong di spion sopir, biar seng bagoyang. Karna kalo bagoyang akang babunyi, terasa seperti back sound film horor. Sepanjang jalan dalam galap buta itu, bulu badang badiri.
Kalo yang tadi tu carita rakyat, deng ada tamba pengalaman sadiki. Ini batul-batul carita asli, beta alami langsung. Lia deng mata kapala sandiri. Kejadiannya itu kira-kira pertengahan 80an, di Air Putri. Suatu kelaziman kalo ada tetangga muslim wafat, selalu digelar pengajian. Tapi waktu itu cuma beta sandiri yang mangaji habis Magrib di ruma keluarga yang tengah berduka.
Almarhum ini katong pung tetangga, baku deka ruma. Jarak ruma mungkin cuma labe dua meter. Beta seng parlu sebut antua pung nama, deng keluarganya. Seng etis. Intinya itu, setelah 7 hari, antua pung arwah biasa maso ke salah satu anak laki-lakinya. Antua pung ana ini sebenarnya su tinggal tapisah. Dia su berkeluarga. Karna dia pung bapak meninggal, makanya dia datang.
Arwah bapaknya itu datang, setelah Magrib atau malamlah. Arwah maso ka anak laki-laki yang beta sebut tadi. Kalo dia su takancing, arwah su maso, langsung dia pung muka berubah kaya orang tua. Pipi tamaso, keriput. Mulu juga mirip mulu orang tua yang su ompong.
Selama arwah maso di dalam tubuhnya, macam-macam diajak bicara. Arwah parna bilang, dia lala (capek) bajalang dari Mangga Dua. Mangga Dua ini kawasan pekuburan Islam. Parna juga dia minta makan, dikasi makan, satu panci disikat habis. Bagitu laki-laki tersadar, dia mangaku lapar. Orang yang ada di situ tentu heran. Lho, yang tadi makan banya itu sapa?
Parna juga, setelah arwah maso ka laki-laki itu, dia minta mau bicara deng katong pung ipar. Katong pung ipar ini suku Bugis. Antua asal Bone tapi seng parna pulang kampung. Arwah, melalui laki-laki itu, panggel beta pung ipar. Katanya, dia pung bapak—maksudnya beta pung ipar pung bapak—mau bicara. Padahal, antua pung bapak itu dikebumikan di kampung halaman yang nun jauh di Sulawesi Selatan. Eh, bisa ee?
Katong samua tambah heran, karna laki-laki itu—yang sama sekali seng tau bahasa Bugis—malam itu tiba-tiba bicara pake bahasa Bugis. Bicara deng katong pung ipar. Apakah itu arwah laeng? Kejadian di tenga malam itu biking orang yang lia akang bertanya-tanya.
Laki-laki itu ada beberapa hari kemasukan arwah. Setiap kali dia maso rumahnya setelah Magrib, seng lama lai dia takancing. Arwah yang ada dalam dirinya nanti kaluar atau pulang menjelang Subuh. Kondisi ini biking laki-laki pucat gara-gara kurang tidor. Karna keadaan itu juga biking banya orang terganggu, akhirnya antua diminta supaya jang datang-datang do. Sejak itu, carita mistis ini seng terjadi lagi, hilang dengan sendirinya.(*)
Makassar, 3 Maret 2024
IKUTI BERITA DAN ARTIKEL LAINNYA DI GOOGLE NEWS
Penulis : Redaksi
Editor : Redaksi
