Nah, yang rawan itu, kalo pemain baku rampas bola di deka katong, para penonton. Karena dekat, katong lia dong pung kaki baku cikar, berebut bola. Lama-lama tadorong sampe ke penonton. Sio, bisa-bisa ada yang tertimpa pemain.
Lebe cilaka lai, kalo pemain tandang bola, lalu bola malayang ka arah penonton. Ale bisa bayangkan, akang pung karas itu bagimana. Beta pung muka parna kana bola, karna nonton talalu deka. Ampong jua, akang pung saki eee. Beta pung badang yang dolo-dolo itu kurus karempeng, langsung tadudu, saking karasnya kana bola. Itu mungkin beta pung soe hehehe.
Bicara PSA Ambon pada masa keemasannya, berarti katong bicara sejarahnya. Klub-klub anggota bond atau perserikatan PSA Ambon sudah ada sejak tahun 1900an. Antara lain, Pusparagam, HVC (Hative Voetball Club), Bintang Timur, Putnus (Putera Nusantara), deng Perspim Benteng. Beta sempat lia Pusparagam barmaeng. Itu nama yang beta masih inga.
Ada banyak pemain top yang parna maeng di PSA Ambon. Nama-nama beken ini terus berkembang dan jadi andalan klub-klub besar Tanah Air. Bahkan dong masuk skuad Timnas Indonesia.
Kalo ale pecinta bola, pasti ale tau nama-nama ini. Inga kaseng, Bertje Matulapelwa (Persija/Timnas PSSI), Nicky Putiray (Persebaya/Timnas), Jacob Sihasale (Persebaya/Timnas), Simson Rumapasal (PSM/Warna Agung/Persija/Timnas), Yance Lilipaly (Niac Mitra/Persebaya/Timnas), Toni Tanamal (Persebaya/Timnas), Najib Assagaff (PSA/Timnas), deng John Parinusa (PSA/Timnas ABRI). Masih banya nama-nama laeng yang berkiprah di level nasional/internasional.
E, sori, sabar do... Beta lupa kalo tentang sejarah PSA Ambon ini, beta ada kutip dari tulisan Novi Pinontoan (web.archive.org). Dangke Bu, beta sama deng ale, katong sama-sama rindu lia PSA Ambon berprestasi kayak dolo-dolo.
Katong rindu ulasan-ulasan tentang permainan PSA Ambon, seperti dolo-dolo katong baca di Tabloid Bola, yang terbit sejak tahun 1984, atau di tabloid Tribun Olahraga, yang terbit tahun 1983. Kalo tabloid Bola itu maso grupnya Kompas Gramedia, sedangkan Tribun Olahraga itu satu grup deng penerbit Suara Pembaruan. Media-media cetak ini biasa katong bali di emperan Pertokoan Pelita. Beta pung kakak Toto (Rusyoto Tompo), yang rajin bali tabloid deng koran.
Dolo itu, beta pung kakak Cully carita, PSA parna baku lawang deng PSM Makassar. Dong bertanding di Lapangan Merdeka. Saat PSM Makassar ka Ambon, dong nginap di Hotel Lokodia, juga parna di Hotel Anggrek. Itu karena PSM Makassar ada datang beberapa kali, untuk barmaeng lawang PSA Ambon.
Saat pemain PSM Makassar ada di Ambon, katong pung orangtua jamu dorang makan di rumah. Itu taong 60an, saat katong masih tinggal di Wainitu. Rupanya, salah satu pemain PSM Makassar, menurut Kak Cully, masih punya hubungan keluarga deng katong pung Mama. Katong pung Mama malah sempat diajak nonton PSM Makassar, saat maeng lawang PSA Ambon.
Pemain PSM Makassar yang beta maksud itu adalah Hafid Sijaya. Antua ini Hj Pia pung kakak. Hafid Sijaya, menurut artikel yang ditulis M. Dahlan Abubakar (kompasiana.com), merupakan gelandang terhebat PSM di masanya. Antua sezaman deng Rasyid Dahlan, yang parna perkuat PSSI pada era 1960-an.
Beta sakarang mangarti, kanapa beta pung kakak Rustam Tompo (almarhum), pung pakdaengang itu, Daeng Sijaya. Pakdaengang ini salah satu ciri orang Makassar, yang melekatkan nama orang tatua di dia pung nama. Jadi, Rustam Tompo Daeng Sijaya itu ternyata karna ambe Hafid Sijaya pung nama, salah satu pemain PSM Makassar yang parna maeng di Lapangan Merdeka.(*)
IKUTI BERITA DAN ARTIKEL LAINNYA DI GOOGLE NEWS
Penulis : Redaksi
Editor : Redaksi
