Bacarita Birman

Awas Bengko

BACARITA BIRMAN

Oleh: Elifas Tomix Maspaitella (Pemerhati Sosial)


Basudara tuang hati jantong!

Dar kalmaring amper malang sampe matahari su mau di atas kapala par oras ni, antua Acim muka tinggal tabembeng tarus. Tabula bale deng Sander. Dia macang hati sanang bagitu.

Acim : Sander, se ada biking apa?

Sander : ada nganga abang dar kalmaring sampe skarang mata tar pindah ni. Hahaha

Acim : ose pung nene moyang. Beta skot se slak se rubu e

Sander : hahahaa….kalu kala tu mangaku sa abang. Mar musti angka muka jang tundu la kaget testa makang kom pintu

Acim : Alexander, beta kas inga se e. Ose tar sadawar deng beta.

Sander : dawar seng sama, tagal itu jang talalu pastiu deng beta

Acim : angka blempar se lai

Sander : jadi mangaku kala to?

Acim : oe karnikus alus e, ose tu bakabas parsis bubara padahal tetu umpang gete-gete saja mo

Sander : iyo mar abang kala to? Beta baru kancing deng 2 dobol sa su kalalerang, itu kong beta tutu dua jalang lai, pasti talantang dar kadera

Acim : ose tu barakal. Barmaeng deng se ni bukang musti pake orang mawe. Basimpang kartu. Adaharos koco kartu tinggal kurang slak par slak

Sander : itu dong bilang teknik. Dawar bole tinggi mar kal Ilmu masih randa jang hega-hega

Acim : iyo beta mau lia se pung ilmu tinggi ni. Awas jang tinggi cuma tagal taru di ujung bulu sero. La tagal sombong, ika akang di pohong langsa. Pas tenga busu la skrek lai ujong ta ero dapa pohong

Sander : katong pake besi cor

Acim : iyo, la makang karat

Sander : kal barane sabantar katong ulang

Acim : suda jua. Ose cuma barakal par talang beta kopi palang-palang la beta talang wa.

Sander : hahaha….itu jua teknik

Acim : iyo barakal par tar karja di ruma to. Story basar. Bajalang ukur jalang kuliling la topu dada parsis tuturuga.

Hahahaha……dong dua nih baku malawang cuma tagal maeng ampa jalang.


Penulis : Redaksi
Editor : Redaksi

Berita Serupa

Lihat Juga
Close
Back to top button