Oleh: Elifas Tomix Maspaitella
Orang tatua deng basudara hati tuang jantong!
Wer ada bagus. Bukang tagal seng ujang, mar antua Acim deng Sander bajalang sama-sama pi kabong. Baru stori sadap paskali sampe tatawa sama-sama. Vor dong dua ini nih, hal bagini ni akang lucu tagal aslinya dong dua parsis tusa deng tikus. Pas su dekat jalang mata par tabage ka masing-masing pung dusung, dong dua ambe napas di boku kacil yang ada tampa dudu.
Acim: Sander e, macang beta biar su umur mar labe kuat dari se ka
Sander: Sapa bilang. Tadi beta yang bajalang antar-antar abang mo. Kalu beta mau laju, abang iko sang hosa lai mar tar dapa
Acim: hahahaha…..iyo, se antar beta mar sampe ana lidah kaluar tu
Sander: Hahaha……dapa lia lai e
Acim: itu tar usah lia. Beta umpang se bajalang sambil stori par tes kata se kuat ka tar ada. Buktinya ose manyao beta sa deng suara amper ilang-ilang, baru deng napas ujung idong po
Sander: hahahaha…….abis su lama baru nai lai nih abang. Mangarti jua, lama di bendar to
Acim: la ini skang se bisa cuci kabong ni abis ka seng Sander e
Sander: Ao, kalu seng mampu cuci la beta kura akang sa to abang. Hahahahaha
Acim: hahaha….se pung bagini-bagini yang skang lupa arti istilah-istilah di kabong
Sander: Beta seng bisa lupa itu. Cuci kabong tu bukang pake sabong deng kanji to. Abang kira kabong ni abang pung kaeng salimong kapa
Acim: hahaha….iyo ale. Mar jang lupa palatar se pung bulu samata di tengah-tengah kabong tu dolo, akang biking antua Nani cengkeh brapa pohong di pinggir tu tar garser
Sander: palatar?
Acim: yang Tuangdosa, bapa kaminangang. Sander e. Cuci kabong se mangarti. Mar palatar se seng mangarti lai?
Sander: Maksud abang beta letu bulu-bulu ni ka?
Acim: hahahaha……dosa tar sadiki. Bulu tu letu bagumana lai Sander e. Letu tu jaga duriang ka seng kayo salawaku yang di jaga-jaga pala sana tu
Sander: letu beta tau. Mar palatar ni abang baru biking istilah baru kapa?
Acim: Sudah jua Sander e. Se pi cuci kabong sa jua. Se bae su sampe, mar beta masih musti hotu sadiki langgar boku kayo kanari di atas tu lai
Sander: Nanti, hotu ni beta masih inga akang arti
Acim: sudah jua Sander. Baku malawang istilah-istilah deng se ni skang matahari tikang bungang-bungang kapala yo katong balong par maso kabong.
[Acim langsung hotu ka antua pung dusung, kase tinggal Sander badiri manganga, tar tau kata ada rai apa]
Sander: Cuci kabong. Itu kase barsih rumpu-rumpu supaya bisa batanang kasbi, kaladi, patatas, pisang ulang ni jua. Mar palatar bulu ni apa? Rekeng akang ka ambe tali tong yang su tutu cengkeh anana nih ka apa e?
[Sander tinggal rai akang palatar bulu pung arti. Yo skrek lai asap su nai di antua Acim pung kabong]
Sander: tuangampong, antua Acim su babakar. Laki-laki tua ni pasti dia barmaeng keadaang supaya dia abis cuci kabong beta balong par kore lai tagal rai dia pung kata rai-rai tu.
[Lalu Sander maso cuci kabong. Jadi dong dua ni akort par mulai batanang kumbali tagal mau harap bali di pasar skang balong par tenga taong lai su makang bubur pap]
IKUTI BERITA DAN ARTIKEL LAINNYA DI GOOGLE NEWS
Penulis : Redaksi
Editor : Redaksi
