Lia Keadaang
Oleh: Elifas Tomix Maspaitella
Orang tatua deng basudara hati tuang jantong!
Pagi-pagi lai Sander su bembeng parang deng mancadu, la pi ka bawah pohong gayawas di paitua Acim pung jiku rumah. Paitua Acim yang baru abis sambayang subuh dapa lia deng antua terewas dia jua po.
Acim: [deng suara basar alam] Alexander stop!
Sander: Stop apa abang?
Acim: coba ose lia dalang negri ni, gayawas cuma sisa satu itu sa la ose mau rubuh akang? Adaharos yang anana samua su tar tau akang ujud pohong-pohong dari dalang negri sampe di ewang tagal osorang apapa sadiki batabang, batabang! Se pi jang beta medi se deng sosi panggal ni
Sander: Sapa jua mau tabang gayawas
Acim: Kong itu mancadu di se tangang tu par apa?
Sander: Tagal itu. Guntur mau pica jua ada ujang ampas dolo. Apapa tu tanya, jang langsung bataria. Coba kalu beta jantong talapas?
[Acim bajalang pi par Sander]Sander: Beta mau goso mancadu deng parang di batu goso ini do
Acim: Se mau pi mana?
Sander: Dusung to
Acim: Sander, coba se loko bulu ayang tu par beta pula-pula talingang do
Sander: Sudah jua. Su tar ada wasit par katong dua lai jadi jang biking par bakumalawang yang tar abis-abis lai.
[Sander langsung dudu goso mancadu di Acim batu goso di bawah pohon gayawas]Acim: Mar ini se batul mau pi dusung? Jang se biking diri parsis jago-jago batabang, Alexander e. Potongang badang macang se ni, loko bajalang ka dusung deng kaki tangang ampa sa. Itu jua kalu sampe di atas, ose jago.
Sander: Ao, jang biking beta pung rajing tamaso
Acim: Bukang bagitu. Mar loko bae ose bajalang kosong ka atas sa. Jang se balaga loko mancadu deng parang. Macang se ni, pas sampe di buarao pas nai-nai ka negri lama deng se dudu lai te, Sander
[Sander, stop goso mancadu]Sander: Kalu bagitu beta pi deng parang sa jua
Acim: Kalu boleh. Mar, tadi malang Tuhan Yesus datang par se kong se su ubah kalakuang ka?
Sander: Abang e, beta su bilang, beta sudara parampuang su tar ada par jadi wasit, jadi stop. Ini dunya su susah. Bakabong saja jua. Barang-barang skang mahal. Minya tanah skang su susah. Mau goreng pisang par katong dua minong kopi sabeker jua mar skang minya kalapa deng gula di paitua Dullah pung pondok jua pasti harga nai.
Acim: Sio, kalakuang bagini kalu akang su dari dolo bukang, se su kase kala antua Cang
Sander: Abang tu nonton brita sadiki. La musti pikir jao kamuka
Acim: hahaha……Sander e, se ada baru goso mancadu, beta pung kalapa karing su di dapor. Se satu langkah dari teras par ke kabong, beta su timbang cengkeh karing.
Sander: Abis skang abang di kampong sa mo
Acim: Iyo, seng sama se la pardidu, pas dunya susah baru bale cari tampa orang tatua tanang dodomi. Goso parang tu sadiki, akang muka sup arsis gargaji tu. Beta mau maso makang talam sagu, la pi timbang bunga pala
[Sander tar tau mau badiri ka dudu goso parang. Dia dalang hati, Antua Acim ni batul lai. Coba kalu tinggal di negri bagini, jang kata harga minya tanah nai lai, akang pabrik tutu jua hidop taunya sanang sa. Mar biar bagitu, dia su tekad par bakabong. Dunya su susah]IKUTI BERITA DAN ARTIKEL LAINNYA DI GOOGLE NEWS
Penulis :
Editor :
