Seng Bisa Lupa

Oleh: Elifas Tomix Maspaitella

Orang tatua deng basudara hati tuang jantong! 

Ini ana Alexander ni dia skang dapa cigi dari paitua Acim nih jua. Bajalang ukur jalang tar kabar, biar kata itu spotong lai. Ini dia ada baru sampe mar tar tau dari mana, la mau pi lia antua Acim.

Sander: Om Acim e, assalamualai

Acim: Stop deng se pung muka munafik tu Alexander. Lebe bae se bale ka rumah sana, la jang inja beta kintal nil ai

Sander: Su lama tar baku dapa beta kira om kata aer su meti, mar ini masi aer nai e. Rambu su puti mar tabiat tar baroba e

Acim: (marah paskali la loko batu di muka trap-trap) Ose pi jang beta medi kase se poncor darah, Sander. Piiiiii (Acim bataria basar sampe orang-orang yang ada di muka rumah smua kaget tar sadiki)

Pandita Tinus yang ada langgar di situ pi par Sander.

Sander: Papi e, lia paitua satu ni do

Acim: Bapa Pandita e, bawa akang ana tu la pi buang dia di ujung tanjong sa. Manusia tar guna tu

Pandita Tinus: Sander e, mari katong ka se rumah jua

Sander: Mar Papi, Om Acim ni ada kanapa kong jumawa beta macang bagitu. Lia beta sama musu sa, padahal satu negri ni tau katong dua sama deng bia deng batu. Memang tempo-tempo sang kucing deng tikus lai tu jua mar itu cuma basangaja to

Pandita Tinus: Jang bicara di sini. Mari ka se rumah jua

Sander deng Pandita Tinus bale ka Sander rumah la dudu di bangko paramponang.

Pandita Tinus: Sander, satu negri ni bingung kata se ni bajalang bawa bini ana ka ujung dunya sablah mana kong sampe tar bisa kabar katong. Rumah ni su lawa-lawa, sapu-sapu tarnate su tumbuh sampe maso dalang foris ni. Kamong ni dari mana?

Sander: Papi, beta deng tugas to. Tempo-tempo katong cek rumah nih dari antua John. La Syaiful jua ada baku balas fesbuk deng beta pung kacil dong mo

Pandita Tinus: Bukang itu yang katong tunggu. Katong tu tunggu se yang kiring pasǎng, mar macang se lupa par samua orang dalang negri ni. Sampe se lupa Paitua Acim pung segala rupa hal.

Sander: Mar mangapa antua marah macang bagitu. Beta musti pi par antua tagal yang bisa kas turung antua tensi cuma beta

Pandita Tinus: Mar par oras ni ale yang kas’ nai paitua pung tensi

Sander: Ao, beta pi soso beta pung sudara parampuang, la minta talam sagu sa, laki-laki tensi turung Papi

Pandita Tinus: Itu yang biking laki-laki tambah murka ale. Se ka sana la pas bilang Caca Oda deng se dapa skot te

Sander: Ao, beta pung sudara parampuang tu laki-laki pung aer sirang kapala

Pandita Tinus: Sander. Anging jua bisa par hentar kabar, kalu burung su lalah. Daong jua bisa par tulis pasang, kalu kartas su abis. Potlot kalu tumpul bisa kikis ulang, asal ada tau ale ada di mana. Tagal samua tar tau, la se su macang tar inga katong di sini, maka dari itu samua yang su tatanang dalang dong dua pung hidop macang akang tacabu deng akar-akar. Kalu su bagitu la sapa mau tanang akang kumbali, Sander e. Beta ni tau dong dua pung hidop. Beta jua suka Riwayat kase conto kamong dua biar kata se tu inja pintu greja skali sataong.

Sander: Papi pung maksud apa? Beta jadi macang pikirang lai

Pandita Tinus pi bisi-bisi par Ola, Sander pung bini, kata Caca Oda su seng ada. Ola aer mata jatuh, la langsung lari ka Om Acim rumah. Sander mau iko, mar Pandita Tinus tahang. Dari jao lia bagini Ola su baku polo deng Paitua Acim la dong dua su manangis.

Pandita Tinus: Ose pung aer sirang kapala su biking paitua Acim tensi turung. Jadi se pi mangaku dosa par antua.

Sander: Mar ada apa ni Papi?

Pandita Tinus: Pi ka sana biar se tau di sana. La kalu paitua Acim mau tumbu se, itu labe dari bagus lai

Sander pi ka Om Acim rumah. Om Acim cuma nganga la goyang-goyang tangang suruh Sander jang rapat. Ola datang la bilang kabar tu par Sander. Langsung Sander lombo, tar tau mau apa. Dudu sa. Muka barat sang baras satu karong strep biru jadi tar kuat par angka nganga Om Acim lai.

Acim: Ola, bilang par karnikus tabakar ni, eso lusa kalu dia mau pi, pi sandiri, jang bawa-bawa se deng anana.  La bawa se pung karnikus ni pi pulang dolo. Saminggu ni, cuma se deng anana sa yang bisa datang ka mari. Karnikus ni kalu dia mau tarbang, loko tarbang sa. Duriang su deng buah, duku deng langsa lai su kaluar bunga. Kase tinggal dia pi nisi akang sampe dia poro biru.

Langsung Om Acim maso dalang rumah, la Ola tarek Sander tangang la dong dua bale. Sander bajalang taru tangang dua-dua di kapala.(*)

IKUTI BERITA DAN ARTIKEL LAINNYA DI GOOGLE NEWS

Penulis :
Editor :