Kopi Pagi

Oleh: Elifas Tomix Maspaitella

Orang tatua deng basudara hati tuang jantong!

 Ada ujang-ujang nih mar Sander su pi ka antua Acim pung rumah.

 Acim: Eh, se kluar sana. Poti, poti!

Sander: Katong balong par dudu lai su suruh kluar tuh bagumana lai om e. Panta balong par rasa kadera lai po

 Acim: ose pung badaki tu la bawa tonar maso dalang beta rumah. Lia se panta sandal tu. La lia se pung daki di flur tuh. Itu apa?

Sander: ada jua tar slaber flur mo. Flur ni niuw jua beta pung sudara parampuang yang slaber sabang hari po

[Paitua Acim muka langsung layo. La Sander lai skrek. Su bicara salah]

 Sander: Om e, seng, beta maksud tu…..ao sudah jua. Beta ka blakang ambel kaeng lap do la seka akang peci ni

 Acim: su tau tampa tu, la kalu tau diri, biking

[Tar lama Sander bale la dudu seka peci tampa sandal di flur, tagal ada ujang-ujang dia batamu pagi-pagi di om Acim rumah]

 Sander: su niuw ulang nih bukang

 Acim: tau….

 Sander: Mar wer ni su tar batul lai

 Acim: Parsis ose [Paitua Acim dudu baru nganga ka langit sa, macang hati masih saki par Sander jadi seng meku dia sadiki lai]

 Sander: Ada apa di langit sana kong nganga ka atas trus. Leher seng saki o

 Acim: tau….

 Sander: Ao, bagini-bagini, kopi sabeker deng talam sagu boleh. Mar yah sudah jua, sudara parampuang su seng ada jadi katong dudu stori sampe gargantang karing sa

 Acim: Tau dapor. Tau termos. Tau degu-degu. Tau toples gula deng kopi. Tau sondo pung ujud. Ada kaki. Ada tangang. Jang cuma tau pake mulu

 [Sander seng stori apapa lai. Dia tau paitua Acim masih marah dia tagal tar kabar, baru dia tar ada dalang paitua pung duka basar]

 Sander: Aer panas tu kalu kas’ dudu sadiki, yang penting angka panutu panci, akang manguap, tempo-tempo lai su dinging

 Acim: Ini balangang tar turung dari tungku. Bara balong mati jadi abu

 Sander: o iya. Kalu bagitu beta pi biking sandiri jua

 Acim: pake mulu!

 [Sander langsung ka dapor la biking kopi sandiri. Tar lama dia bale ka foris. Bawa kopi dua beker. Dia tau paitua Acim pung kler beker jadi dia biking par paitua Acim lai]

 Sander: Kopi ni akang rasa sama sa. Biar di rumah ka, rumah kopi ka. Rasa sama sa. Mar kalu laki-laki yang biking, macang akang rasa laeng ka? Coba minong do

 Acim: minong sandiri

 Sander: la beta su biking dua tu

 Acim: iyo. Akang rasa laeng. Barang kalu parampuang biking, beker niuw, barsih, tar ada ampas di pinggir-pinggir. Mar kalu laki-laki biking, minong la talang kopi deng samu-samu samua

[Sander lia ka beker langsung skrek tagal samu tambong di beker tu. Dia poti-poti kas pindah samu, mar tagal beker panas, deng kopi tumpah jua mi]

 Acim: laki-laki kalu biking kopi akang rasa laeng. Rasa samu, la rasa flur lai. Ingatang, aer tu ambe frei, mar kopi tu ambe pake kepeng. Jadi jang buang-buang. Tundu la jilat se kopi rasa flur tu. Itu kopi yang laki-laki biking. Rasa laeng.

 [Langsung paitua Acim badiri kas’ tinggal Sander sandiri. Sander bale ambe kaeng lap yang dia seka peci tadi par kas’ barsih flur tagal kopi tumpah. Paitua Acim maso kamar. Sampe blakang pintu baru paitua tatawa suara tar kaluar]

 Acim: su rasa flur tu la pi mandi ujang sisa pagi tu. Beta mau sono ulang

 [Sander garu kapala la bale gantong kaeng lap di tali dalang gadong di dapor, trus bale ka dia rumah deng pikirang: “Paitua nih dia masih marah beta sudah”] 

IKUTI BERITA DAN ARTIKEL LAINNYA DI GOOGLE NEWS

Penulis :
Editor :