Puisi

Kalau Katong Mau Maju

Kalau katong mau maju

Seng boleh capat maraju
Mari dudu di lesa
Jang pake cakelele jadi alasan
Katong sebenarnya kurang kaselang

Kalau katong mau maju
Kaluar dari zona prang, akang pahit
Kalau rasa sapa bisa, dia masnait
Samua tikam panggayo, tarik majo
Dengar satu tifa, dari Bailo

Kalau katong mau maju
Samua musti rasa satu
Katong balajar dari Kewang
Bagara capat jaga ewang
Bakira jua tarkira tanusang

Kalau katong mau maju
Inga ale – beta sapa, makang sagu
Samua musti rapat, baku kele
Jang tagal kepeng, sudara baku pele
Nanti katong pung hidop ancor lele

Baca Juga: Rumah Tua: Halasoite

Kalau katong mau maju
Jang kas tunju biji ruku
Jaga dati deng gunung tanah
Biar garam melele, tanah harus ada
Biar kapal bayar, pulau katong jaga

Kalau katong mau maju
Tarus jaga kapata deng cidaku
Su seng oras voor jadi katang
Jang biking gagartang
Lalu huwele alasan prang

Kalau katong mau maju
Inga tahuri di Gunung Nunusaku
Bataria ka Jakarta dong seng meku
Mari katong sama-sama keku
Jang ale kuku

Kalau katong mau maju
Urus labuang deng sa’aru
Coba lia ikang ada puar
Di sana katong pung tanuar
Jang sampe tacabu dari akar

Kalau katong mau maju
Mari ale pung tangan lah maku-maku
Manari di tanah sandiri deng hatipane
Jang lai pake alasan prang, sampe
Mari toma ale, Sou Salamate!

Nusa Ina, 3 April 2022

Kalau katong mau maju

Penulis: Izak YM Lattu (Pemerhati sosial budaya dan dosen pada Universitas Kristen Satya Wacana Salatiga dan Dewan Redaksi potretmaluku.id.)

IKUTI BERITA LAINNYA DI GOOGLE NEWS


Penulis : Redaksi
Editor : Redaksi

Berita Serupa

Lihat Juga
Close
Back to top button