Rumah Tua: Halasoite

Rumah Tua: Halasoite

Lani voor Mama Lily deng Ua Bitha
Samua basudara di Amerika dan Balanda
Katong bajalang langgar benua
Bukang cuma langgar lautan, maar samudera
Hidop su lama di orang pung gunung tanah

Mau pulang, maar seng bisa
Pulang musti perlu kartas deng tinta
Katong seng samua punya
Hati rindu Ina-Ama pung lesa
Katong hanya bisa pulang deng rasa
Biar cuma liki (pepeda) tapong tapioka
Cakalang es, nutu (isap) sampe hosa

Untung masih ada rumah tua
Katong bisa basena anggale, supaya seng susah
Orang sudara satu tali pusa
Rumah tua bukang cuma soal ale deng beta
Ini tentang yanae manawa–mapina (anak laki-laki perempuan)
Tampa kumpul generasi kadua
Balong pernah inja Lease, Tenggara deng Nusa Ina
Maar darah seng bisa manyangkal tanah

Biking rumah tua voor apa?
Jang talalu raci kua
Pasti ada yang bilang bagitu jua
Memang seng ada apa-apa
Cuma ada harta pusaka
Akang pung nama kapata deng silsilah
Seng bisa bali deng uang satu dermaga
Katong ika manumata sama-sama
Colo-colo deng ane liki (makan papeda), itu saja
Halasoite (tampa siri) deng hala (kasbi), su bisa

Rumah tua musti ada
supaya dong bisa tahu asal dar mana
Bataria lawamena (maju), dong sambung haulala (semangat)
Kalo orang tanya yale seina (ale sapa)
Bisa jawab yau Malukua (beta orang Maluku)
Supaya dong salalu inga yamane kelea (kampong kawan)
Matinou Yamane (lia kampung), kalo dong su bisa
Sou salamate (salamat selalu) Mama deng Ua

Salatiga, “Walang Kota Umale,” 3- 4 April 2021