Dodomi
Ade, katong hidop dari bunga cengkeh-pala
Walanda datang cari sampe mandi omba
Cuma tagal mau cari ini tanah
Ade, kalo ale tanya mangapa katong susah?
Beta bale tanya sadiki jua
Katong nih sapa?
Ade, cengkeh-pala ada juta-juta di ewang
Mangapa ale seng dengar kewang
Jang pikir poro kamboti saja ade tuang
Ade, orang masu pasang dodeso
Katong dua dolo tamaso
Hidup orang sudara takoro
Ade suruh dong toro
Ampong dosa jua helo
Cengkeh-pala su macam daong konto-konto
Ade, kalo dong bataria lisa o (perang)
Ale musti tabaos mo’o (tidak)
Jang maniso nanti katong tacolo
Ade, jang talalu balari
Mari kaka ajar manari
Katong dua satu dodomi (ari-ari)
Ade, hidup musti manis macam donci
Itu yang katong cari
Sou salamate wari (selamat adik)
Salatiga, “Walang Kota Umale,” 1 April 2021
Hahesi
Jang ale kira nasi bisa tukar harga diri
Akang seng bisa jadi fandasi apalai hahesi
Cuma bisa voor tanuar hari ini
Jang harap bisa ganti kapata deng lani
Moyang dolo hidop dar goti
Dong sambung nyawa deng ayunan nani
Hidop paleng bahagia ale tuang hati
Apalai kalo sagu su sisi
Di botol ada sopi sadiki
Bukang alkohol pabrik kadar tinggi
Jarang mabo sampe seng tahu diri
Hanya bastori tentang eksploitasi di tanah sandiri
Hidop bukang cuma soal baras deng nasi
Paleng penting tuh hidop deng hati
Biar di tutu saji cuma ada sinoli
Tambah sasendo tarasi deng sapotong kombili
Jang tukar nusa deng nasi
Inga bae-bae, pasang talinga sakali
Ale seng sandiri, masih ada saniri
Jaga hidop orang sudara sampe mati
Salatiga, “Walang Kota Umale,” 1 April 2021
Penulis: Izak YM Lattu
Pemerhati sosial budaya dan dosen pada Universitas Kristen Satya Wacana Salatiga dan Dewan Redaksi potretmaluku.id.
Penulis : Redaksi
Editor : Redaksi
