Bacarita Birman

Pake Kira-kira

BACARITA BIRMAN

Oleh: Elifas Tomix Maspaitella (Pemerhati Sosial)


Orangtatua deng basudara tuang hati jantong!

Ujang anging nih, orang tambong talucu tar brenti, mar bukang di jalang kabong, ini di bendar pung tali pusa paskali.

Acim: Sander e, karusil di siku tu barang mangapa?

Sander: Jang lia karusil ni saja, tar lia beta bajalang tempang ni o?

Acim: Iyo se bajalang hela baru buku kaki su jarning, baru manyala parsis senter duablas batu paskali tu

Sander: Beta talucu la jatu talantang di jalang abang e

Acim: apahari se pi dusung kong talucu? Lars sana tu tar ada peci mo…

Sander: sapa jua mau ka dusung par oras ujang anging ni

Acim: hahaha….taku tabaku basa kapa?

Sander: pastiu deng tabaku, mar ini buku kaki manganta sampe. Nyilu manucu abang e. Sumbur do

Acim: tuangampong, Beta gigi su tar kas bae par mama pinang la skang bagumana lai mau sumbur akang? Pi di antua Ci Ama jua

Sander: la batu tumbu ada tu, kalu seng lasong saja mo

Acim: Iyo ka. Sabar e, beta lia tabaku do, jang sampe abis lai. Mar ini tagal apa kong?

Sander: talucu

Acim: Iyo, di mana? Ka injang sapa perkara?

Sander: di bendar pung tali pusa

Acim: Alexander e, jalang dalang bendar tu smua su deng smen, lalu lumu-lumu jua tar ada macang dalang aer bak tu. Se talucu dalang bendar tu bukang lucu mar tar maso akal

Sander: tuheng, oras ni bukang, jalang dalang bendar tu tampa cilaka, tita sala tampa deng jatu buf lai

Acim: barang?

Sander: mi tuang tau akang. Dong su mesel akang baru licing bukang maeng

Acim: dong bilalu?

Sander: sondor, ada pake tehel tu e

Acim: Sander, jang se biking bodoh Beta

Sander: eh pastiu, buku kaki ada manganta ni pi tumbu pinang jua pop

Acim: eh iyo….sabar e

Sio, antua Acim ni biar kata suka bakumulu deng Sander mar tetap sayang dia sa. Antua su pi tumbu pinang la sumbur Sander buku kaki


Penulis : Redaksi
Editor : Redaksi

Kue/Cookies Enak Berkualitas dari Inggrid Bakery & Pastry

Berita Serupa

Lihat Juga
Close
Back to top button