Mau Tau Anana di Bendar Ambon Pung Karja, yang Bukan Ambtenaar, Ini Akang!
- BUDAYA KALESANG
Kalesang itu artinya peduli, nah di dalam pasar kreatif ini tamang-tamang juga bisa liat budaya peduli yang dibangun di sini, misalnya kalesang budaya, banyak produk yang hadir di sini ni dong usung konsep lokal, misalnya yang jual baju-baju, rata-rata di sini tema Maluku, tapi tetap keren dan update, seng kalah deng brand-brand luar, molukken pride lah.
Ada juga kalesang barang bekas deng sampah, ada kaka Egez dari Tana Paper yang olah limbah kertas liturgi ibadah jadi kertas daur ulang, jadi kertasnya bisa dong pake par bikin kartu ucapan atau kertas lukis, atau cetak liturgy ulang di akang lai bisa 😀
Bagitu jua bangun budaya kalesang selama pasar tu berlangsung, jadi seng boleh ada sampah acara yang tacecer dalam lokasi ataupun di sekitar, dalam urusan ini biasanya selain dari orang RRM yang kase ingat tiap waktu, penjual deng pengunjung jua sadar sampah, ada juga Nona Onco & Green Moluccas yang siap dekeng katong deng persediaan kantong sampah, dong masohi akang rabu-rabu saja bersih. Konci rekeng acara, sampah yang bisa daur ulang dan bernilai ekonomis ni dong ofor ka pemulung, jadi selain bangun kebiasaan baik ada juga rantai sistem yang bagara. Keren to? tarus benahi Ambon, uyeeee!
- ZONA SENYUM
Ale kalo sampe sini, liat barang-barang bagus, makanan enak, ikut kuis atau permainan lalu menang hadiah pasti banyak senyum, apalagi kalo su maraju par pasangan minta beli ini itu lalu dikabulkan too, senyum tu mangkali ekspire tiga taong kemudian kapa, hahaha..
Eh, seng carita kosong, di sini memang samua orang senyum terus, senang, gembira, namanya juga tampa ambel senang. Pokoknya kalo maso di zona Rabu-rabu Market tu ale pung imun nai, pikiran tenang, awet muda, jantong sehat, stress lari parsetang, tersesat di jalan yang benar, pulang ganteng, sak calana rasa labe haringang!
Ade nona kalo hati susah datang ka RRM sa, ada kaka DJ Kenza, anana divisi stage, equip deng keamanan siap hibur deng jaga ade nona, dijamin ade pung senyum akan terbit manis, parsis onde-onde baguling di atas ampas kalapa.. ahaaee, cuee, huuuu 😀
- BEST PLACE OF HEALING-HEALING..
Halaaah, datang saja, ada banyak barang bagus di sini yang bisa ale balanja, makanan enak-enak, tampa user hati yang gundah gulana. Cuci mata, lia jujaro mongare Ambon, tampa crushing-crushing deng palser , su bagus bale cuan lai, gas sayang..gaaas!
“Kalo Cuma sekedar singgah di hidop lebe bae jang lai, beta pung biaya healing talalu basar” nah itu, daripada kepeng abis gara-gara si tar jelas itu, ale su tau musti ka mana to? ~ @miaimanuela
- Yang bikin tulisan ini seng gagah cuma sadap!
(seng percaya seng apapa, beta jua seng paksa kok! Hahahaeee)
Oleh: Revelino Berry (@kutikata.id / purinasi.wordpress)
Penulis : Redaksi
Editor : Redaksi
